14 ساعة بدولارين

نشر في‫:‬الخميس, نيسان 23, 2015 - 11:50
الكاتب/ة: غيث.

اسمي غيث، عمري 15 سنة. تركت سوريا من 3 سنين. وجيت ع لبنان. صرت مغيّر كذا مخيم. أول مخيم كنت فيه بعرسال. وقت بلشت الحرب ع عرسال، هربنا على البقاع. المخيم اللي قعدنا فيه، طلعونا منو رجعوا، بوقتها عطونا مهلة 48 ساعة لنلاقي محل تاني. هلق أنا بمخيم جديد إلي 5 أشهر. وبتمنى وقت اطلع من هون ارجع ع سوريا مش ع أي مخيم تاني.

مش مبسوط هون، منعاني من مشاكل كتيرة؛ ممنوع نتجول، ممنوع نتعلم، مسموح نموت من البرد، مسموح ننحبس لأن ما معنا وراق، مسموح ما يكون عنا مي، ممنوع نشتغل. ع سيرة الشغل مرّة لقيت شغل، بس شو بخبركن شي لقطة. حسيت حالي محظوظ أد الدني. الدوام من ال6  الصبح لل 8 بالليل. 14 ساعة. اذا تأخرت ساعة بينحسم علي نص نهار.

شو الشغل؟ سهل كتير.. أول شي بصف البضاعة بعدان تغليف. وفي أكيد الجلي بمي متلجة. والشطف والتعزيل والتعتيل. وبحال ما اشتغلت منيح أو تعبت بكون العصا ناطرني.

هلق عم تفكروا تسألوني أدي كنت اقبض؟ كتير كتير.. 3000 وأكيد مش دولار.. دولارين.

--