صوت النسوة: رسالة من تحت الماء

نشر في‫:‬الأثنين, اذار 10, 2014 - 10:54
عن صوت النسوة
الكاتب/ة: صوت النسوة.

مرحبا يا جماعة. إنتوا هون؟ أوما في حدا غيري؟ طب معقول أنا الوحيدة اللي عم حس هيك؟  ما في حدن بفكر متلي؟ ما كون عم جن؟ هلق عنجد انا بومة ومسترجلة وبكره الرجال؟ عالارجح هرموناتي عم تلعب كل الوقت. واكيد اكيد من ورايي ما زبط السكس وما انبسطنا؟ بس ما عن افهم ليش عطول بصير معي هيك، شو هالحظ؟  ليش دايمن بتفركش بقصص غريبة، ومهينة وبسمع حكي عالطالع وعالنازل.

دخلك؟ ما حدا علق على وزنك اليوم؟ ما حدا عاملك كقاصرة؟ كم مرة انسألتي إذا مجوَزة او لا، وقديش عمرك وانو ضيعانك ليش ما اتجوزتي لحد هلق؟ كم مرة جرَب رجَال يقلك انت شو بدك ويحللك ويقلك شو لازم تعملي؟ كم مرة هالدولة ومؤسساتها سمتلك بدنك؟ ولا مرة علقتي مع شي مختار؟ او استفزيتي الدركي لأن شكلك مش عاجبوا أو كتير عاجبوا؟ ولا مرة قلك شوفير السرفيس إنَو حمار اللي عطى النسوان دفتر سواقة؟

هالسنة، بيوم المراة العالمي، صوت النسوة حابة تسمع حكاياتكن السعيدة والحزينة، والغضبانة، والمحتارة وكل شي بيخطر على بالكن. لان بدنا نتشارك معكن هالخبريات اللي منعيشها كنساء بالمدرسة، بالشارع، بالسرفيس، بالبيت، بالشغل، عند الحكيم، مع العيلة، بين الاصحاب. كل هالخبريات بتهمنا لان النسوية مش بس مواقف ونظريات، النسوية هي بوصلتنا اللي من خلالها منعرف كيف نحنا بنتأثر بالتصرفات والمفاهيم الذكورية سواء كانت مبطَنة او لا. النسوية بتخلينا نحط اصبعنا على التصرف او التعليق المهين وبتساعدنا نوقفوا.

قبل ما نحارب السلطة، لازم نحدد مواقعنا!

لهيك، ما تخلي شي بقلبك وتقعدي تلومي حالك. شاركينا حكاياتك يللي اكيد بتشبه حكاياتنا. وخبري أصحابك وأصحاب أصحابك وخلينا نفضفض كلنا سوا.

فيكي تختاري وحدة او اكتر من المواضيع الموجودة بآخر هالدعوة. ولأن حكاياتنا متنوعة فيكي تخبري قصة طويلة أو قصيرة وفيكي تحطي إسمك أو  لا. إنت بتقرري. نحنا بس بحاجة لعنوان بريدك الالكتروني لنقدر نتواصل معك وأكيد أكيد مش رح نشارك هالمعلومات الخاصة.

كل القصص اللي رح توصلنا رح ننشرها على موقع صوت النسوة بيومنا العالمي، بـ 8 آذار. وكمان رح ننقي شوية قصص نطبعها ونوزعها! 

لمزيد من المعلومات تواصلو معنا عل: editor@sawtalniswa.com

المصدر: صوت النسوة